ប្រទះឃើញសាកសពអន្ដែតទឹកនៅចំណុចស្រែខ្ចេនស្រុកចិត្របុរី ខេត្តក្រចេះ 
ក្រចេះ៖ ថ្ងៃទី០១ ខែកក្កដា ឆ្នាំ២០២២ នៅវេលាម៉ោង ៣និង៣០នាទី មានករណីប្រទះឃើញសាកសពបុរសម្នាក់អណ្តែតទឹកបឹង នៅចំណុចស្រែខ្ចេន ភូមិស្ទឹងស្វាយ ឃុំដារ ស្រុកចិត្របុរី ខេត្តក្រចេះ។
ប្រភពពីសមត្ថកិច្ច បានឲ្យដឹងថា សពជនរងគ្រោះ ឈ្មោះ វ៉ាន់ ហឿន ភេទប្រុស អាយុ ៣៥ឆ្នាំ ជនជាតិខ្មែរ មុខរបរកសិករ ចំណែកប្រពន្ធជនរងគ្រោះមាន ឈ្មោះ ផាន ចាន្នី អាយុ ២៤ឆ្នាំ មុខរបរមេផ្ទះ រស់នៅភូមិដារ ឃុំដារ ស្រុកចិត្របុរី ខេត្តក្រចេះ។
អំពីរឿងហេតុ នៅថ្ងៃកើតហេតុឈ្មោះ វ៉ាន់ ហឿន បានផឹកស្រាស្រវឹងដើរទៅងូតទឹក នៅចំណុចកើតហេតុតែម្នាក់ឯង ហើយក៏បានដួលបណ្ដាលអោយឈ្លក់ទឹកស្លាប់តែម្ដង។
ដោយឡែក តាមការបំភ្លឺរបស់ឈ្មោះ ផាន ចាន្នី អាយុ២៤ឆ្នាំ ដែលត្រូវជាប្រពន្ធ បានអោយដឹងថា ប្ដីរបស់ខ្លួន ឈ្មោះ វ៉ាន់ ហឿន ផឹកស្រាស្រវឹងពុំបានហូបបាយអស់រយ:ពេលពីរថ្ងៃមកហើយ។
បន្ទាប់ពីកម្លាំងជំនាញ បានសហការជាមួយកម្លាំងប៉ុស្តិ៍នគរបាលរដ្ឋបាលដារ នៃអធិការដ្ឋាននគរបាលស្រុកចិត្របុរី ចុះទៅដល់កន្លែងកើតហេតុពិនិត្យឃើញថា:សពឈ្មោះ វ៉ាន់ ហឿន ពុំមានពាក់ព័ន្ធទៅនឹងបទល្មើសព្រហ្មទណ្ឌនោះទេ រួចក៏បានធ្វើកំណត់ហេតុប្រគល់ជូនក្រុមគ្រួសារយកធ្វើបុណ្យតាមប្រពៃណី៕
ដោយ វណ្ណៈ ភ្នាក់ងារខេត្តក្រចេះ
