ខេត្តកំពង់ស្ពឺ៖ យុវជនម្នាក់បានស្លាប់ភ្លាមៗក្នុងថ្លុកឈាម ហើយយុវជនម្នាក់ទៀតជាមិត្តភក្តិបានរងរបួស បង្កឱ្យមានការភ្ញាក់ផ្អើល ខណៈដែលជិះម៉ូតូឌុបគ្នា ហើយត្រូវបានក្រុមជនដៃដល់ប្រដាប់ដោយកាំបិត ព័ទ្ធកាប់សម្លាប់ តែម្តងមិនទាន់ដឹងមូលហេតុ។
ហេតុការណ៍កាប់សម្លាប់មនុស្ស នេះបានកើតឡើងកាលពីវេលាម៉ោង៧និង១៥នាទីយប់ថ្ងៃទី១៦ ខែមីនា ឆ្នាំ២០២២នៅមុខរោងចក្រកាត់ដេយីហោ វីងស្តាស៊ូ ស្ថិតនៅក្នុងឃុំព្រះនិពាន្ត ស្រុកគងពិសី ខេត្តកំពង់ស្ពឺ។
សមត្ថកិច្ចខេត្តកំពង់ស្ពឺនិយាយថា នៅមុនពេលកើតហេតុ គឺ ឈ្មោះ ជាង វិសាល ភេទប្រុស អាយុ២៥ឆ្នាំ រស់នៅភូមិត្រពាំងម្លប់ ឃុំទួលអំពិល ស្រុកបសេដ្ឋ បានឌុបឈ្មោះ សុខ ធាស៊ិន ភេទប្រុស អាយុ១៨ឆ្នាំ រស់នៅភូមិច្បារមន ឃុំកុមារាជា ស្រុកបាទី ខេត្តតាកែវ ដោយចេញដំណើរ ពីផ្សារប៉ាំងសី តាមបណ្តោយផ្លូវជាតិលេខ៣ក្នុងទិសដៅពីទិសខាងត្បូងទៅទិសខាងជើង លុះដល់មុខវត្តអង្គជុំ ត្រង់ចន្លោះបង្គោលគីឡូម៉ែត្រលេខ៥៤-ទៅលេខ៥៥ ស្រាប់តែ ឃើញមានក្មេងស្ទាវ០១ក្រុម មានគ្នា ០២នាក់ ដៃកាន់កាំបិត ហើយក៏ជិះម៉ូតូដេញតាមកាប់ក្រុម(ជនរងគ្រោះខាងលើ) មកដល់មុខរោងចក្រតុក្កតា គីឡូលេខ៥២-ទៅលេខ៥៣ ក៏មានក្មេងស្ទាវ០១ក្រុមទៀតបានស្ទាក់ដេញតាម រួចក៏ក្រុមជនរងគ្រោះ ជិះម៉ូតូគេចឆ្លងគន្លងផ្លូវ មកទិសខាងលិច មុខក្លោងទ្វារវត្តមន្ត្រីម៉ី (ជិះបញ្រ្ចាសទិសចរាចរណ៍ ទៅទិសខាងជើងដដែល)។
សមត្ថកិច្ចបានបន្តទៀតថា ដោយសារតែក្រុមក្មេងស្ទាវដេញតាមរហូត លុះដល់មុខរោងចក្រកាត់ដេរយីយោ(វីងស្តាស៊ូ) ត្រង់ចន្លោះបង្គោលគីឡូម៉ែត្រលេខ៥០-ទៅលេខ៥១ ក្រុមជនរងគ្រោះបានជិះម៉ូតូបុកបង្គោលភ្លើងបណ្តាលឱ្យដួល ហើយចំណែកក្រុមក្មេងស្ទាវដែលជិះម៉ូតូដេញតាមនោះបានជិះហួសបន្តិច រួចពេលនោះក្រុមជនរងគ្រោះបានយកដុំថ្មគប់ទៅលើក្រុមដែលជិះម៉ូតូដេញកាប់នោះដើម្បីឱ្យរួចពីការតាមកាប់។ ប៉ុន្តែដោយចិត្តប៉ងមកលើក្រុមជនរងគ្រោះទៅហើយនោះ ក្រុមជនដៃដល់(ក្មេងស្ទាវដែល ជិះម៉ូតូដេញតាមកាប់នោះក៏ជិះម៉ូតូ ត្រឡប់មកក្រោយវិញ បានយកកាំបិត កាប់ទៅលើឈ្មោះ សុខ ធាស៊ិន អាយុ១៨ឆ្នាំ ចំក្បាលចំនួន០៤កន្លែង ចំដៃ០២កន្លែង និងខ្នង០១កន្លែង បណ្តាលឲ្យស្លាប់នៅនឹងកន្លែងតែម្តង និងឈ្មោះ ជាង វិសាល របួសត្រូវបានសាច់ញាតិដឹកយកទៅព្យាបាល។
សមត្ថកិច្ច បានបញ្ជាក់ថា ក្រោយពីធ្វើសកម្មភាពកាប់យុវជនរងគ្រោះស្លាប់និងរងរបួសរួចហើយ ក្រុមជនដៃដល់បានឡើងជិះម៉ូតូរត់គេចខ្លួនបាត់ស្រមោល។
ករណីខាងលើនេះ សមត្ថកិច្ចកំពុងសហការជាមួយការិយាល័យជំនាញស្រាវជ្រាវបន្តស្វែងរកចាប់ខ្លួនក្រុមជនដៃដល់ដើម្បីយកមកផ្តន្ទាទោសតាមផ្លូវច្បាប់។
តាមប្រភពព័ត៌មានពីប្រជាពលរដ្ឋរស់នៅម្តុំកន្លែងកើតហេតុ ជាពិសេសនៅក្នុងខេត្តកំពង់ស្ពឺទាំងមូលមានការភ័យខ្លាចខ្លាំងណាស់ ដោយសារតែក្រុមក្មេងស្ទាវ ក្រុមចោរលួច ក្រុមចោរប្លន់ តែងតែធ្វើសកម្មភាព ស្ទើរតែជារៀងរាល់យប់ ថ្ងៃហើយនគរបាលតាមបណ្តាលស្រុក និងនគរបាលខេត្តកំពង់ស្ពឺ ដែលមានលោក សម សាមួន ស្នងការនគរបាលខេត្តកំពង់ស្ពឺ ដែលកាន់តំណែងយូរមកហើយនោះ មិនដែលបង្ក្រាបបាន សូម្បីតែមួយករណីឡើយ ទើបមានករណីក្រុមក្មេងស្ទាវក្រុមចោរលួច ក្រុមចោរប្លន់បំពុលសង្គមកើតមានឡើងជារៀងរាល់យប់ថ្ងៃ។ ហើយប្រសិនបើជាឃាត់វិញបានតែករណី អ្នកប្រើប្រាស់គ្រឿងញៀន និងលេងបៀ តែប៉ុណ្ណោះរាយការណ៍ទៅថ្នាក់លើថាជាស្នាដៃល្អក្នុងការបង្ក្រាបបទល្មើស៕
