ខេត្តសៀមរាប ៖ នាព្រឹកថ្ងៃទី ២៤ ខែកុម្ភៈ ឆ្នាំ២០២០ សមត្ថកិច្ចខេត្តសៀមរាបបានបង្ហាញមុខជនសង្ស័យចំនួន ០៣នាក់ក្រោយពីមានការសហការគ្នារវាងកម្លាំងការិយាល័យព្រហ្មទណ្ឌកម្រិតធ្ងន់ កម្លាំងការិយាល័យប្រឆាំងបទល្មើសបច្ចេកវិទ្យា និងកម្លាំងអធិការដ្ឋាននគរបាលក្រុងសៀមរាប បានចុះស្រាវជ្រាវ និងឃាត់ខ្លួនជនសង្ស័យ ក្រោយមានពីប្រព្រឹត្តបទល្មើសកាលពីថ្ងៃ ១២ ខែកុម្ភៈ ឆ្នាំ២០២០ ។
លោកវរសេនីយ៍ឯក ណុប សារ៉ាក់ អធិការនៃអធិការដ្ឋាននគរបាលក្រុងសៀមរាប បានអោយដឹងថា : យោងតាមបទបញ្ជាលោកឧត្តមសេនីយ៍ទោ ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប បានបញ្ជាអោយកម្លាំងការិយាល័យព្រហ្មទណ្ឌកម្រិតធ្ងន់ សហការជាមួយកម្លាំងការិយាល័យប្រឆាំងបទល្មើសបច្ចេកវិទ្យា និងកម្លាំងអធិការដ្ឋាននគរបាលក្រុងសៀមរាប បានចុះស្រាវជ្រាវ និងឃាត់ខ្លួនជនសង្ស័យ ក្រោយមានពីប្រព្រឹត្តបទល្មើសកាលពីថ្ងៃទី ១២ ខែកុម្ភៈ ឆ្នាំ២០២០ នៅចំណុចក្បែររបងខាងលិចវិទ្យាល័យអង្គរ ស្ថិតនៅភូមិ វត្តបូព៌ សង្កាត់សាលាកំរើក ក្រុង/ខេត្តសៀមរាប មានករណីទំនាស់ដណ្តើមស្រីគ្នា រហូតឈានដល់ការបង្កហិង្សាយកកាំបិតផ្គាក់ និងដាវកាប់ទៅលើជនរងគ្រោះដែលមានឈ្មោះ សោ ស៊ាវគាង ភេទប្រុស អាយុ ១៧ឆ្នាំ រស់នៅភូមិ តាវៀន សង្កាត់សាលាកំរើក ក្រុង/ខេត្តសៀមរាប ត្រូវកញ្ចឹងកពីក្រោយ និងដៃ បណ្តាលអោយរបួសធ្ងន់ កាប់ម៉ូតូ និងមួកសុវត្ថិភាព ។
លោកវរសេនីយ៍ឯកបានបន្តទៀតថា: ក្រោយធ្វើសកម្មភាព ជនសង្ស័យទាំងបីនាក់បានរត់គេចខ្លួន និងព្យាយាមទាក់ទងទៅម្ចាស់គណនេយ្យបណ្តាញសង្គមឈ្មោះ Jea Ka ដេីម្បីយកថ្លៃឈ្នួលសម្លាប់មនុស្សចំនួន ១០០០ដុល្លាអាមេរិក ។
ក្រោយកើតហេតុ នៅថ្ងៃទី ២១ ខែកុម្ភៈ ឆ្នាំ២០២០ សមត្ថកិច្ចបានចុះស្រាវជ្រាវ និងឃាត់ខ្លួនជនសង្ស័យទាំងបី ហើយពិនិត្យឃើញជាប់ពាក់ព័ន្ធប្រើប្រាស់ខុសច្បាប់នូវសារធាតុញៀនផង ។
ជនសង្ស័យទី ១: ឈ្មោះ យ៉ុន សូវៀត ភេទប្រុស អាយុ ២៧ឆ្នាំ ទីលំនៅបច្ចុប្បន្ន ភូមិ ស្រះស្រង់ខាងត្បូង សង្កាត់នគរធំ ក្រុង/ខេត្តសៀមរាប ។
ជនសង្ស័យទី ២ : ឈ្មោះ ហ៊ាន វីណៃ ភេទប្រុស អាយុ២៧ឆ្នាំ ទីលំនៅបច្ចុប្បន្ន ភូមិ ស្រះស្រង់ខាងត្បូង សង្កាត់នគរធំ ក្រុង/ខេត្តសៀមរាប ។
ជនសង្ស័យ ទី ៣: ឈ្មោះ ជៀក ប៊ុណ្ណា ភេទប្រុស អាយុ ២១ឆ្នាំ ទីលំនៅបច្ចុប្បន្នភូមិ គ្រួស សង្កាត់ស្វាយដង្គំ ក្រុង/ខេត្តសៀមរាប ។
បច្ចុប្បន្ន ជនសង្ស័យទាំងបីនាក់ ត្រូវបានសមត្ថកិច្ចឃាត់ខ្លួន និងកំពុងកសាងសំណុំរឿងបញ្ជូនទៅសាលាដំបូងខេត្ត ដេីម្បីអនុវត្តតាមនីតិវិធីបន្ត ៕ដោយ÷ឆាយដែន
