ខេត្តឧត្ដរមានជ័យ ៖ នៅថ្ងៃទី០៥ ខែកញ្ញា ឆ្នាំ២០២២ គេឃើញមានទីតាំងប្រព្រឹត្តិល្បែងស៊ីសង មាន់ជល់តាមអនឡាញ កើតមានពាសពេញស្រុកអន្លង់វែង
មិនដឹងថាលោកវរៈសេនីយ៍ឯក ស៊ូ នៅ អធិការនគរបាលស្រុកអន្លង់វែង អសមត្ថភាព ឬក៏ប៉ះពាល់ដល់ផលប្រយោជន៍យ៉ាងណានោះទេ បានជាកិច្ចសន្យាបញ្ឈប់ប្រព្រឹត្តមាន់ជល់តាមអនឡាញ សាបដូចទឹកទន្លេ និងបញ្ជារបស់លោកស្នងការខេត្តឧត្ដរមានជ័យ គ្មានប្រសិទ្ធភាពបែបនេះ ឬការចុះធ្វើកិច្ចសន្យាបញ្ឈប់លេងល្បែងមាន់ជល់តានអនឡាញ រួចថតរូបបង្ហោះបំភាន់ភ្នែកមហាជន និងធ្វើរបាយការណ៍កុហកថ្នាក់ដឹកនាំ?។
ជាក់ស្ដែង ដោយមានការចង្អុលបង្ហាញពីលោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ កាលពីថ្ងៃទី២៤ ខែសីហា ឆ្នាំ២០២២ វេលាម៉ោង ១៤:០០នាទី លោកវរសេនីយ៍ទោ ស៊ូ នៅ អធិការ នៃអធិការដ្ឋាននគរបាលស្រុកអន្លង់វែង បានចាត់កម្លាំងជំនាញ និងប៉ុស្តិ៍នគរបាលរដ្ឋបាល ចុះត្រួតពិនិត្យស្រាវជ្រាវតាមបណ្តាទីតាំងហាងកាហ្វេ និងកន្លែងលក់ឆ្នោតឡូតូ (មានអាជ្ញាប័ណ្ណស្របច្បាប់) ស្ថិតនៅក្នុងភូមិសាស្រ្តស្រុកអន្លង់វែង។ ជាលទ្ធផល បានរកឃើញទីតាំងលួចលាក់លេងល្បែងសុីសងខុសច្បាប់ជល់មាន់តាមទូរទស្សន៍ (អនឡាញ) សរុបចំនួន ០៦ទីតាំង ដោយអនុវត្តតាមនីតិវិធីជំនាញ សមត្ថកិច្ចបានធ្វើការអប់រំ និងកិច្ចសន្យាដល់ម្ចាស់ទីតាំងនៅនឹងកន្លែងខាងលើ ឲ្យបញ្ឈប់ការបើកលេងល្បែង ឬផ្តល់ទីតាំងលេងល្បែងសុីសងខុសច្បាប់ជល់មាន់តាមអនឡាញ និងល្បែងស៊ីសងគ្រប់ប្រភេទផ្សេងទៀត ក្នុងករណីមានការលួចលេងល្បែងភ្នាល់ដាក់ប្រាក់ខុសច្បាប់ ត្រូវទទួលខុសត្រូវចំពោះមុខច្បាប់។
លោក ស៊ូ នៅ អធិការនគរបាលបាលស្រុកអន្លង់វែង បានអោយដឹងតាមទូរស័ព្ទថា រឿងល្បែងប្រៀបដូចវែកចកអញ្ចឹង ទាល់តែប៉ូលិសទៅអង្គុយចាំមុខផ្ទះតែម្តង បើចាត់ការរដ្ឋបាលមិនស្ដាប់ មានតែវិធានការច្បាប់ បើចាត់ការច្បាប់ លោកនឹងសុំយោបល់ ទៅខាងតុលាការ ៕
ដោយ ៖ សាន់ ឆដា
