ព្រះវិហារ៖ កាលពីព្រឹកថ្ងៃទី១១ ខែមីនា ឆ្នាំ២០២៥ នៅកងរាជអាវុធហត្ថខេត្តព្រះវិហារ បានបើកវគ្គហ្វឹកហ្វឺនបំប៉នសណ្តាប់ធ្នាប់ជួរទ័ព ប្រចាំឆមាសទី១ ឆ្នាំ២០២៥ ក្រោមវត្តមានឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ និងជាប្រធានគណៈបញ្ជាការឯកភាពរដ្ឋបាលខេត្ត ដោយមានការចូលរួមពីលោក ឧត្តមសេនីយ៍ត្រី កង សៅគុណ មេបញ្ជាការកងរាជអាវុធហត្ថខេត្តព្រះវិហារ និងឯកឧត្តម អស់លោក លោកស្រី ប្រធានស្ថាប័ន អង្គភាពជុំវិញខេត្ត ព្រមទាំងនាយទាហាន នាយទាហានរង នៃកងរាជអាវុធហត្ថខេត្តព្រះវិហារ និងខេត្តស្ទឹងត្រែងបានអញ្ជើញចូលរួមផងដែរ។
លោក ឧត្តមសេនីយ៍ត្រី កង សៅគុណ បានលើកឡើងថា៖ ក្នុងពិធីបើកវគ្គហ្វឹកហ្វឺនបំប៉នសណ្តាប់ធ្នាប់ជួរទ័ព ប្រចាំឆមាសទី១ ឆ្នាំ ២០២៥ នាពេលនេះដោយមានវត្តមានរបស់ ឯកឧត្តម លោក លោកស្រី គឺបានបង្ហាញនូវការយកចិត្តទុកដាក់ លើក ទឹកចិត្ត អង្គភាព នាយទាហាន នាយទាហានរង នៃកងរាជអាវុធហត្ថខេត្តព្រះវិហារយើងខ្ញុំផងដែរ។
លោកបានបន្តថា៖ ដោយអនុវត្តទៅតាមផែនកាលេខ ០៩/២០២៥ ផក ចុះថ្ងៃទី១៩ ខែកុម្ភៈ ឆ្នាំ២០២៥ របស់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថ លើផ្ទៃប្រទេស ស្តីពីពិធីសម្ពោធសមិទ្ធផល ដាក់ឱ្យប្រើប្រាស់មជ្ឈមណ្ឌលហ្វឹកហ្វឺន កងរាជអាវុធហត្ថភ្នំជុំសែន រីករាយ និងការប្រារព្ធខួបលើកទី៣២ ទិវាកងរាជអាវុធហត្ថ (១៤ កក្កដា ១៩៩៣ ១៤ កក្កដា ២០២៥)។ អង្គភាពកងរាជអាវុធហត្ថខេត្តព្រះវិហារ បានរៀបចំពិធីបើកវគ្គហ្វឹកហ្វឺននៅក្នុងឱកាសនេះ ដើម្បីបង្កើនចំណេះដឹង និងពង្រឹងសមត្ថភាព គុណភាព ជូននាយទាហាន នាយទាហានរង នៃកងរាជអាវុធហត្ថ ក្នុងការអនុវត្ត ភារកិច្ចជំនាញកងរាជអាវុធហត្ថឱ្យទទួលបានលទ្ធផលល្អប្រសើរ ផ្តល់ចំណេះធ្វើ ឯកទេសសណ្តាប់ធ្នាប់ជួរទ័ព ផែនឈរ ផែនដើរព្យុះហយាត្រា ឱ្យមានការឯកភាពគ្នាសម្រាប់ចូលរួមអបអរសាទរពិធីប្រារព្ធខួបលើទី ៣២ ទិវាបង្កើតកងរាជអាវុធហត្ថ ធ្វើឱ្យនាយទាហាន នាយទាហានរង មានស្មារតីទទួលខុសត្រូវ មានវិន័យ សីលធម៌ និងគុណធម៌ មានមនសិកាការងារ និងអត្តចរិតស្លូតត្រង់។
នាឱកាសនោះឯកឧត្តម គីម រិទ្ធី បានមានប្រសាសន៍ថា៖ បច្ចុប្បន្ន ថ្វីត្បិតតែប្រទេសយើងមានសុខសន្តិភាពពេញលេញ និង មានការអភិវឌ្ឍរីកចម្រើនលើគ្រប់វិស័យ ប៉ុន្តែការអភិវឌ្ឍសមត្ថភាព កងកម្លាំងប្រដាប់អាវុធ គឺពិតជាត្រូវធ្វើឱ្យបានជាប់ជាប្រចាំ ដើម្បី ត្រៀមកម្លាំងអន្តរាគមន៍ ឆ្លើយតប និងដោះស្រាយនូវគ្រប់សភាពការណ៍ផ្សេងៗ។
ឯកឧត្តមបានបន្តថា៖ យើងត្រូវចងចាំថា កងកម្លាំងប្រដាប់អាវុធ គឺមិនត្រឹមតែជាកម្លាំងស្នូលក្នុងការទទួលរ៉ាប់រងលើកិច្ចការពារបូរណភាពទឹកដី អធិបតេយ្យភាពជាតិ ការងារថែរក្សាសន្តិសុខ សណ្តាប់ធ្នាប់ ការងារ ទប់ស្កាត់បង្ក្រាបបទល្មើសនានា នោះទេ កងកម្លាំងប្រដាប់អាវុធ ទាំងអស់ គឺជាកម្លាំងដ៏រឹងមាំក្នុងការជួយសង្គ្រោះ គ្រោះមហន្តរាយ និង គ្រោះអាសន្នផ្សេងៗ និងចូលរួមជួយការងារអភិវឌ្ឍសង្គមជាតិ ប្រកបដោយភាពកក់ក្តៅ និងមានទំនុកចិត្តពីប្រជាពលរដ្ឋផងដែរ។ ការរៀបចំបើកវគ្គហ្វឹក ហ្វឺនបំប៉នសណ្តាប់ធ្នាប់ ជួរទ័ពប្រចាំឆមាសទី១ ឆ្នាំ២០២៥ ដល់យោធិន នៃកងរាជអាវុធហត្ថខេត្តព្រះវិហារ និងខេត្តស្ទឹងត្រែង នាឱកាសនេះ គឺជាការរួមចំណែកក្នុងការ ពង្រឹងសមត្ថភាពកងកម្លាំង ប្រដាប់អាវុធ ទាំងខាងផ្នែកចំណេះដឹង ឆន្ទៈ ស្មារតី ក៏ដូចជាការ ពង្រឹងនូវកាយសម្បទា ឱ្យមានភាព រឹងមាំ ស្វាហាប់ ក្នុងការអនុវត្ត តួនាទី ភារកិច្ចរបស់ខ្លួន ឱ្យស្របតាមទិសដៅរបស់រាជរដ្ឋាភិបាលគឺ កងកម្លាំងប្រដាប់អាវុធត្រូវ មានកម្រិត យល់ដឹងខ្ពស់ មានមនសិកា ស្មារតីស្នេហាជាតិ មានកាយសម្បទា រឹងមាំ ស្វាហាប់ និងរហ័ស រហួន គ្រប់កាលៈទេសៈ ជាប់ជានិច្ច ៕
ដោយ៖ប្រាក់ សុភាស់
